Buvayda tumanida 8-mart — Xalqaro xotin-qizlar kuni munosabati bilan tuman Madaniyat markazida bayram tadbiri tashkil etildi. Tadbirni Buvayda tumani hokimi Behzodjon Ibragimov ochib berib, barcha xotin-qizlarni samimiy muborakbod etdi. U o‘z tabrigida ayollarning jamiyat hayotidagi o‘rni, oilalar farovonligi va yurt taraqqiyotidagi beqiyos hissasini alohida ta’kidlab o‘tdi. Bayram munosabati bilan bir guruh munis va mo‘tabar onalarga sovg‘alar topshirildi. Tadbir ishtirokchilari skripka ohanglari ostida tantanali ravishda kutib olinib, bayram davomida badiiy chiqishlar barchaga ko‘tarinki kayfiyat ulashdi. Estrada xonandalari Ilhom Ibrohimov hamda Jo‘rabek Qodirovning kuy-qo‘shiqlari, raqqosalar va jajji qizaloqlar ishtirokidagi sahna ko‘rinishlari bayramga o‘zgacha shukuh bag‘ishladi. Ko‘tarinki ruhda o‘tgan tadbir xotin-qizlarga ko‘rsatilayotgan e’tibor va ehtiromning yana bir yorqin ifodasi bo‘ldi.