Buvayda tumanida O‘zbekiston Respublikasining “Jismoniy va yuridik shaxslarning murojaatlari to‘g‘risida”gi Qonuni ijrosini ta’minlash hamda murojaatlar bilan ishlash samaradorligini oshirish masalalariga bag‘ishlangan o‘quv-amaliy seminar-trening tashkil etildi. Tadbir davomida tuman hokimligi mutaxassislari tomonidan murojaatlar bilan ishlash tizimidagi yangiliklar, amaldagi tartib-taomillarga kiritilgan o‘zgarishlar, murojaatlarni qabul qilish, ko‘rib chiqish va ijrosini nazorat qilish jarayonlari yuzasidan batafsil tushuntirishlar berildi. Shuningdek, ijro intizomini mustahkamlash, hujjatlar bilan ishlash madaniyatini oshirish hamda murojaatlarni ko‘rib chiqishda mas’uliyatni kuchaytirish masalalariga alohida e’tibor qaratildi. Seminarda xotin-qizlar faollari, korxona va tashkilotlarda ijro intizomi hamda murojaatlar bilan ishlash uchun mas’ul etib belgilangan xodimlar ishtirok etdi. Ular tomonidan amaliyotda uchrayotgan muammolar va ularni bartaraf etish yo‘llari yuzasidan fikr-mulohazalar bildirildi. Mutaxassislar ishtirokchilarga fuqarolar murojaatlarini o‘z vaqtida va sifatli ko‘rib chiqish, har bir murojaat bo‘yicha manzilli choralar ko‘rish hamda ijroni doimiy nazoratda ushlab borish bo‘yicha tavsiyalar berdi. Mazkur seminar-trening murojaatlar bilan ishlash tizimini yanada takomillashtirish, davlat organlari faoliyatida ochiqlik va mas’uliyatni kuchaytirish hamda aholining davlat idoralariga bo‘lgan ishonchini mustahkamlashga xizmat qiladi.