Xalq deputatlari Buvayda tuman Kengashining navbatdagi 19-sessiyasida hudud ijtimoiy-iqtisodiy hayoti, qonuniylikni ta’minlash hamda budjet mablag‘laridan samarali foydalanish bilan bog‘liq muhim masalalar ko‘rib chiqiladi. Sessiya kun tartibidan tumanda jinoyatchilik va huquqbuzarliklarning oldini olish, fuqarolarning huquq va erkinliklarini himoya qilish borasida amalga oshirilgan ishlar yuzasidan tuman prokuraturasi axboroti o‘rin olgan. Shuningdek, hududda jamoat tartibini saqlash va aholi xavfsizligini ta’minlash bo‘yicha ichki ishlar organlari tomonidan olib borilgan ishlar yuzasidan hisobot tinglanadi. Deputatlar tomonidan “Infratuzilma va ijtimoiy barqarorlik” jamg‘armasi mablag‘larini yo‘naltirish masalasi yuzasidan iqtisodiyot va moliya bo‘limi boshlig‘i o‘rinbosari axboroti eshitiladi. Shuningdek, tumanning 2025-yil mahalliy budjeti ijrosi, jamoatchilik fikri asosida shakllantirilgan tadbirlarni moliyalashtirishga yo‘naltirilgan mablag‘lar sarfi hamda tashabbusli budjet jarayonlariga oid yangi tartiblarning ijrosi yuzasidan ham iqtisodiyot va moliya bo‘limi boshlig‘i o‘rinbosari tomonidan hisobotlar taqdim etiladi. Bundan tashqari, mahalliy budjet daromadlar rejasining ortiqcha bajarilgan qismi hisobidan foydalanish bo‘yicha avval qabul qilingan qarorlarga o‘zgartirish kiritish masalasi ham muhokama etiladi. Sessiya davomida tumanda normativ-huquqiy hujjatlar ijrosi va huquqni qo‘llash amaliyoti holati yuzasidan adliya organlari axboroti tinglanadi. Shuningdek, Kengash doimiy komissiyalari tarkibiga oid tashkiliy masalalar yuzasidan Kengash kotibiyati axborot beradi. Sessiya yakunida kun tartibidagi barcha masalalar bo‘yicha tegishli qarorlar qabul qilinishi kutilmoqda.