Sessiya Buvayda tuman hokimligi Axborot xizmati tomonidan YouTube platformasidagi rasmiy kanal orqali jonli efirda namoyish etildi va keng jamoatchilik e’tiboriga havola qilindi. Sessiya ishida tuman hokimi, xalq deputatlari, tuman tashkilot va idoralarining rahbarlari, shuningdek, jamoatchilik vakillari ishtirok etdi. Kun tartibiga hududni ijtimoiy-iqtisodiy rivojlantirish, mahalliy byudjet barqarorligini ta’minlash hamda aholining ijtimoiy muammolarini manzilli hal etishga qaratilgan dolzarb masalalar kiritildi. Sessiyada O‘zbekiston Respublikasi Prezidentining 2024 yil 16 dekabrdagi PQ-440-sonli qarori ijrosi doirasida 2025 yil davomida Buvayda tumanida amalga oshirilgan ishlar yuzasidan tuman hokimi Behzodjon Ibragimovning hisoboti eshitildi. Hisobotda investitsiya loyihalarini amalga oshirish, tadbirkorlikni qo‘llab-quvvatlash, yangi ish o‘rinlarini yaratish va infratuzilmani rivojlantirish borasida erishilgan natijalar qayd etildi. Shuningdek, 2026 yilda tuman hududida amalga oshirilishi rejalashtirilgan “drayver” loyihalar bo‘yicha dastlabki manzilli ro‘yxat, 2026 yilga mo‘ljallangan Buvayda tumanini kompleks ijtimoiy-iqtisodiy rivojlantirish dasturiga kiritilayotgan o‘zgartirishlar deputatlar tomonidan muhokama qilindi va ma’qullandi. Ijtimoiy sohadagi masalalar doirasida 6-bosqich “Ayollar daftari”ga kiritilgan xotin-qizlar bilan mahallabay va shaxsbay ishlash tizimi yuzasidan amalga oshirilgan ishlar haqida axborot berildi. Natijada ijtimoiy muammolari hal etilgan bir qator xotin-qizlarni mazkur ro‘yxatdan chiqarish bo‘yicha qarorlar qabul qilindi. Sessiyada, shuningdek, Buvayda tumanining 2026 yilgi mahalliy byudjeti tasdiqlandi hamda 2025 yil davomida byudjet daromadlarining ortiqcha bajarilgan qismi hisobidan foydalanish bo‘yicha ilgari qabul qilingan qarorga qisman o‘zgartirishlar kiritildi. Sessiya yakunida ko‘rib chiqilgan masalalar yuzasidan tegishli qarorlar qabul qilinib, ularning ijrosini ta’minlash bo‘yicha mas’ul rahbar va tashkilotlarga aniq vazifalar belgilandi. Sessiyaning to‘liq video yozuvi Buvayda tuman hokimligi Axborot xizmati rasmiy YouTube kanalida joylashtirildi.