Buvayda tumani Poshshopirim qishlog‘idagi “Kasr” tantanalar saroyida “Qo‘sha qarish saodati” nomli bayram tadbiri o‘tkazildi. Ushbu tadbir tuman hokimligi hamda “Nuroniy” jamg‘armasi tuman bo‘limi tashabbusi bilan tashkil etildi. Tadbirga tuman hududida uzoq yillar birga yashab, oila bag‘rida totuvlik va mehr-oqibatni asrab kelayotgan, ibratli hayot yo‘liga ega 7 nafar namunali juftlik taklif etildi. Uzoq yillar qo‘sha qarib, hayotning turli sinovlaridan yelkama-yelka o‘tgan otaxon va onaxonlar yig‘ilganlar oldida o‘z umr yo‘llari, oiladagi muhim qadriyatlar, farzand tarbiyasida o‘zaro hurmat va sabr-toqatning ahamiyati haqida so‘zlab berdilar. Tadbir yakunida tashkilotchilar tomonidan faxriy juftliklarga esdalik va qimmatbaho sovg‘alar topshirildi. Tuman Madaniyat bo‘limi san’atkorlarining kuy-qo‘shiqlari esa ishtirokchilarga bayramona kayfiyat ulashdi. **Buvayda tumani hokimligi Axborot xizmati**