Buvayda tumani hokimi Behzodjon Ibragimov rahbarligida tumandagi “Rafiqjon Hoji o‘g‘li Abdulla” fermer xo‘jaligi dala maydonida 2025-yilgi paxta yig‘im-terimiga tayyorgarlik, paxta tashish tirkamalarini qabul qilish, g‘o‘za maydonlarida defoliatsiya tadbirlarini o‘tkazish va 2026-yil hosili uchun boshoqli don ekinlarini ekish bo‘yicha amaliy seminar tashkil etildi. Seminarda barcha fermer xo‘jaliklari rahbarlari, qishloq xo‘jaligi tashkilotlari vakillari, nuroniylar hamda soha mutaxassislari ishtirok etdilar. Tadbir davomida kelgusi mavsum hosildorligini oshirishga qaratilgan chora-tadbirlar, agrotexnik qoidalarga qat’iy amal qilish, yerga sifatli ishlov berish, sertifikatlangan urug‘liklardan samarali foydalanish va suvdan oqilona foydalanish masalalari muhokama qilindi. Shuningdek, seminar doirasida 2025-yilgi paxta yig‘im-terimini tashkil etish, transport vositalarining tayyorgarlik holati, terimchilarni jalb etish, ularning mehnat sharoitlarini yaxshilash va xavfsizlik masalalariga alohida e’tibor qaratildi. Seminar yakunida Qur’on tilovat qilinib, duolar qilindi hamda osh tarqatildi. Mazkur tadbir fermerlar o‘rtasida tajriba almashish, mavsumga puxta tayyorgarlik ko‘rish va kelgusi yil hosildorligini oshirish yo‘lida muhim ahamiyat kasb etdi.